بــكاء الأب على ابنـه

من طرف **Admin** الأحد فبراير 22, 2009 10:19 am

-

- بـكاء الأب على ابنه -

-

مساكم الله بالخير والنور والعافيه ...

قريت اليوم هالقصة في كتاب ( سالفة وقصيدة ) الجزء الثاني ...
للراوي / محمد بن علي الشرهان .. وبصراحة اعجبتني السالفة والقصيدة وحبيت اطرحها للجميع عساها تنال استحسانكم واعجابكم ...

قصيدة الرثاء اللي ابذكرها هي للشاعر العلم البارز المعروف الشاعر سليمان بن مشاري بن علي الناصري التميمي من النواصر من تميم اهل الداخلة من اقليم سدير توفي رحمة الله عليه عام 1389هـ ، ويذكر في القصيدة هذي ( قصيدة الرثاء ) اللي ابجيب بعضها لان القصيدة طويلة يذكر أن ولده عبدالرحمن راح مع جيش بن سعود يوم غزا اليمن هذاك الحين عام 1349هـ واستشهد وكل ما وصلوا مكان أرسل لأبوه رسالة وصلنا للمكان الفلاني ويوصّف له المكان الديرة الفلانيـة ولقينا فيها فلان وشفنا النخل الفلاني والشعيب الفلاني والمكتوب هذا يبطي ما يوصل يتأخر يقعد شهر أو شهرين ما يوصل لأنه من يد واحد في يد واحد إلين يوصل ولهذا تلاحظون بعض المكاتيب الأوله إذا جا المكتوب وإلى في وسطه مكتوب لواحد ثاني وتغدي بعض المكاتيب على متن البيز من كثر المكاتيب اللي فيها وتعليقات السلام اللي على الظرف في جنوبه يمين ويسار وفيه مثل يقول " علم الشر ماهنا أبرك منه " هالحين هو يوم يروح الأخبار هذي اللي يرسلها لأبوه تبطي ما توصل لكن يوم إنه مات ثاني يوم والخبر واصل لأبوه فيذكر هذا عاد بالقصيدة والحقيقة بعد من ضمن القصيدة كان يتشرّه على واحد في الحملة وراهـ ما علمه لأنه ما درى إلا بواسطة قائد الحملة بعد ما مضى فترة أو إنه متشرّه على اللي معه في الحملة وراه ما عزاه أو شي من هالقبيل وهذاك رايح معه في المغزا والأبيات واضحة وفيها موعظة والرثاء باب من أبواب الشعر يقول فيها :

الله مـــن عـلــم دهــانــي
مناب في خيـر مـن جانـي
أول عـلـم طــرق سمـعـي
فـي خـط أحمـد الفـوزانـي
يـذكـر خــط داخــل خـطـه
جا من بكـر بـن سمحانـي
غدا القلـب مصـاب عقبـه
ياليـتـه خــط مـــا جـانــي
مــا تـجـرا يخبـرنـي بـــه
إلا بـكـر بـــن سحـمـانـي
يـقـول إن ابـنــك تـوفــى
واصبـر والله المستعـانـي
وصبّر نفسك واترك ذكره
واعص نفسك والشيطاني
ولو هـو حـي وجـال فيهـا
قلـت وقلنـا الجالـي فـانـي
وخـبـر مـوتـه مــا كتبـتـه
خرابـيـط ابــو سعيـفـانـي
وقريته وإلـى ويـش اقـرا
الــدواهــي والأحــزانـــي
مع إني مـن شوفـه ميّـس
مـن قـبـل تـعـاد الابـدانـي
انـا فـي القطـب الشمـالـي
وهو فـي القطـب اليمانـي
واشوف اني عقبـه موتـه
مـن طـمـان فــي طمـانـي
مـــا سـويـتـا يـــا كـتـابـه
خـيــر فـابــوه سليـمـانـي
محـال انـي ماذكـر يـومـه
بـيـوم معـلـوم الا ابكـانـي
مـــا عــاتــب الله نـبـيــه
يعقـوب بطـول الاحـزانـي
عـلـى ولــده يــوم فـقــده
بـنــى بـيــت لـلاحـزانــي
الا اخبـر عنـه انـه كـاظـم
واثـنـى عـلـيـه الـقـرآنـي
عــســى ديــــرةِ تــوفــى
فيهـا ابنـي عبدالرحمانـي
عساهـا الا موضـع قـبـره
يرقص فيها الف شيطاني

ومن حر ما يونس والا هو طيب وخيّر ويدعي للناس كلهم يقول :-

عــلــم بـالـخـيـر يـتــأخــر
وعلم الشر اسرع ما جاني
وش فــرق الكـتـوب الأول
مـن فـرق المكتـوب الثانـي
أنــــا بـاجـلــس واتـمـنــى
لـــو مـــا تـفـيـد التـمـانـي
ان الله يــســيــل قـــبـــره
مـــا تـهــدّم لـــه بـنـيـانـي
سـلامــي يــامــن تــغــرّب
غـربـتـيـنِ فــــي زمــانــي
غربـة رجــا منـهـا يـرجـع
وغـربـة فـنـا منـهـا فـانـي
ولا عـمــره يـــوم تـغــرّب
مـــا تــعــدى ذا الـمـكـانـي
سـلامـي يـــا مـــن تـولّــع
بالاسـفـار ويـومــه دانـــي
كـنّـه يطـلـب لــه زعـيـمـه
مطالـعـهـا مـــع سـرقـانــي
وهـــي الـمـنـيـه داعـيـتــه
ولا لــــه عـنـهــا تــوانــي
يطـلـب رزق مقـسـوم لـــه
ومكـتـوب لــه بالضـمـانـي
هــذا مــن الله واخـــذه الله
واليـقـيـن مـــن الايـمـانـي
وانــا مـاجــزع واتـسـخـط
والاخـــاذ الـلــي عـطـانــي
الــتــجــزّع والـتــســخــط
في الحديث مـن الشيطانـي
وليته مـات وموتـه عنـدي
مـــات بـقـلايـع ودرانــــي
عسى اللي ما جـزع لموتـه
هــو جــا يـمّـي وعـزانــي
وانـــا اعـرفــه ويعـرفـنـي
لكـن مـا عنـده فـي شـانـي
تــحــل بـسـاحـاتـه دهــيــا
بمصـيـبـة حـبـيـب دانــــي
ويـبـي يـاخـذه الـلـي خــذه
ولــو طــال بـــه الـزمـانـي
هذا باب كل يدخل معه من انس ومن جاني
هــذا بــاب ماخـتـص احــد
بـــه دون فـــلان وفـلانــي
كــل يـعـرف انــه واضـــح
وهــو الطـريـق السلطـانـي
هـذا المـوت اللـي تـواسـت
فـيــه الـعـانـه والاعـيـانـي
هـذا المـوت اللـي ذلـت لـه
هالـخـلـيـقـة بــالاذعــانــي
هذا المـوت اللـي مـا عنـده
لا فــي العـالـي ولا الـدانـي
هذا المـوت اللـي مـا تاقـف
دونــه نـــواب السلـطـانـي
هذا المـوت اللـي مـا يرحـم
طـفــل ولا شــيــخ فــانــي
هـذا المـوت اللـي مـا خلـى
راع الـخـن وراع الـخـانـي
هـذا المـوت اللـي مـا ياخـذ
فيـمـن يـاخـذ زود اثمـانـي
هـذا المـوت اللـي لـو فـتـه
وخلـيـتـه خـلـفـي لاقــانــي
قــل هــذا الـمـوت المـوكـل
يـفـنـي الـعـالـم الانـسـانـي
وفـي بـرهـا وفــي بحـرهـا
من وحـوش ومـن حيتانـي
ومـن بـه روح فهـو رايـح
الـفـوقـانــي والـتـحـتـانــي
وقـول الله ابلـغ مـن قولـي
كـــل مـــن علـيـهـا فـانــي
والله لـــولا ســـوة عــمــا
مــع تـبــارك والرحـمـانـي
وسـورة طـه والـم نـشـرح
لــك صـــدرك والفـرقـانـي
لابــنــد فــاعــلا طـويــلــة
صــوت تسمـعـه الاذهـانـي
وارفع صوتي وابرد جاشي
فــي ظـنـي مـاحـد خطـانـي
وانــــادي ثـــــمِ انـــــادي
وانــا فــي ارفـــع مـكـانـي
يـا قبـر يالـلـي فــي صبـيّـا
ســر بـــاذن الله البـلـدانـي
بـلـدان فــي نـجـد مـريـفـة
امـــان وديـــن ورجـعـانـي
غـريــب مـــات بـوطـنـكـم
دينـه مــن خـيـر الاديـانـي
عـلـى مـذهـب ابــن حنـبـل
وعـبـد الحـلـيـم الـحـرانـي
هاللـي جـاكـم سـنـة تسـعـة
واربعـيـن مـــن الـزمـانـي
والـــــف وثلاثـمـيـةحـجـة
لـهـجـرة سـيــد العـدنـانـي
ياللـي عنـده يـوم تحشـرق
نفسـه بالله هـو مـا طرانـي
هـو مـا قـال والله يابـوِ لـي
مـن يشوفـه هـو واخوانـي
ليـتـي عـنـده يــوم يغـسـل
ويـدرجــونــه بـالاكـفـانــي
ابـلـثـم عـيـنــه وخـشـمــه
والـثــم شـفـتـه تـشـفـانـي
وليتـي عنـده يــوم يجـهّـز
عـلـى مـنـحـور العـيـدانـي
وليتـي عنـده يــوم امـولـه
صــلاة مــن غـيـر آذانـــي
وقـــوف مافـيـهـا ركــــوع
ولا ســجـــود بـالاذقــانــي
الا دعـــــــاءِ يــدعــونـــه
للمـيـت كـأيـن مــن كـانــي
وليتي عنده يـوم اقفـوا بـه
للـقـبـر شـيــب وشيـبـانـي
ليـتـي عـنـده يــوم يـنــزل
فـي الملحـود ابـا الديـدانـي
وليتـي عنـده يــوم تهـايـل
عـلـيـه الــتــرب الـبـنـانـي
وليتـي عنـده يــوم تـوقـف
عــلــيــه الـنـصـيـبـاتـانـي
ان كـان اباقـف وادعـو لـه
بالـثـبـات مــــن الـفـتـانـي
في الحديـث ادعـوا لاخيكـم
فــانـــه يــســـال الآنـــــي
وعـنـه صـلــى الله عـلـيـه
وسلـم فـي الحديـث الثانـي
انـــه يـسـمـع فـــي لـحــده
مـن فوقـه وقــع الحذيـانـي
ولا شـفـتـه مـــن تــغــرب
الا حــلـــمِ مـــــا هـنــانــي
ليـل وانــا دهــش الخـاطـر
بـيـن الـنـايـم واليقـضـانـي
عسـى ربـي يجمعـنـي بــه
فـي الجـنـة مــع الولـدانـي
وعسـى لـه مـع مـا اتمنـى
جــنــى الجـنـتـيـن دانــــي
وعـســاه مــقــرب فـيـهــا
مع من فـي روح وريحانـي
وترفع لـه رايـات البشـرى
فــي يــوم المـعـاد الـثـانـي
ويـافـد فــي الـوفـد الفـايـز
بالحسنـى وفــد الرحمـانـي
منتـهـاهـم بــــاب الـجـنــة
يتنـون اذن مـن رضـوانـي

هذا جزء من القصيدة والحقيقة هذي من المرثيات الجملية والمؤثرة في النفس مرثية صرخة ألم من والد على ولدهـ وبيّن فيها سنة وفاته ووينه متوفـي فيه ويدعي له وللمسلمين والله يقبل دعاءهـ ودعاء كل مسلم